MELCHIOR – LJÓS Í SKÓM
June 5 @ 17:00 - 19:00
free
Hin rúmlega hálfrar aldar gamla gæðasveit Melchior er um þessar mundir að senda frá sér sjöundu langspilsplötu sína, LJÓS Í SKÓM. Af því tilefni verður efnt til hlustunarteitis í Smekkleysu, Hverfisgötu 32, föstudaginn 5. júní kl. 17.00 – 19.00. Þar munu þeir Hilmar Oddsson, Hróðmar I Sigurbjörnsson og Karl Roth kynna þetta nýjasta verk sitt og segja frá því í stuttu máli. Svo verður plötunni auðvitað rennt og gestir geta vætt kverkarnar yfir tónunum.
Melchior var stofnuð af unglingspiltum úr Hagaskóla og Austubæjarskóla árið 1973 og fyrsta starfsskeið sveitarinnar náði yfir menntaskólaárin (1973-1977), en hljómsveitin lagðist í dvala árið 1980. Þetta var tími hljómsveita eins og Spilverks þjóðanna, Þokkabótar og Diabolus in Musica, en þær lögðu allar áherslu á frumsamda og órafmagnaða (acoustic) tónlist. Afrakstur þessa fyrsta starfsskeiðs voru plöturnar Silfurgrænt ilmvatn (1978), en af henni varð lagið Alan vinsælt í óskalagaþáttum þess tíma og Balapopp (1979). Þá tók við 29 ára starfshlé. Sveitin birtist okkur svo aftur með plötunni Melchior árið 2009. Af henni er lagið Fiskisúpa Sigríðar í Fjöruhúsinu sem naut talsverðra vinsælda. í kjölfar hennar gaf sveitin út safnplötuna Melchior < 1980. Árið 2012 var komið að plötunni Matur fyrir tvo og svo kom konseptplatan Hótel Borg út árið 2019. Og nú er það LJÓS Í SKÓM, 5.júni á því herrans ári 2026.
Meðlimir Melchior skilgreina tónlist sína sem stofupopp.
Þeir sem hafa forkeypt plötu eða disk geta nálgast eintök sín við þetta tækifæri.
